Skrøpelege eldre i Samhandlingsbarometeret

Eldre sin helsetilstand

Eldre menneske viser store individuelle skilnader i helsetilstand, og aldersgruppa 75 år og eldre omfattar både spreke og robuste personar så vel som multisjuke og skrøpelege. Robuste eldre har ofte evne til å tole akutte påkjenningar på same måte som andre vaksne.

Skrøpelege eldre har derimot betydeleg redusert reservekapasitet og auka sårbarheit for påkjenningar. Dei har ofte atypiske symptom fordi organsystema og evna til å oppretthalde likevekt er svekka. Blant skrøpelege er det vanleg med ufrivillig vekttap, tap av muskelmasse og muskelstyrke, redusert ganghastigheit, eit lågt aktivitetsnivå og dei blir lett utmatta [1]. Skrøpelege eldre er ei av dei prioriterte pasientgruppene for helsefellesskapa. For meir informasjon om pasientgruppene sjå https://www.helsedirektoratet.no/tema/helsefellesskap/styringsinformasjon.

Definisjonar

Skrøpelege eldre

Skrøpelege eldre er definert som personar 75 år og eldre som har minst ei IPLOS-måling [2] i kommunale helse- og omsorgstenester med ein funksjonsverdi mellom 3 og 5 på minst eitt av dei ti områda nemnt i tabellen nedanfor. I samsvar med Helsedirektoratets definisjon er funksjonsverdiane summert i fire distinkte scoregrupper:

• Noko redusert funksjonsnivå (score 2-9)
• Redusert funksjon (score 10-15)
• Dårleg funksjon (score 16-25)
• Svært dårleg funksjon (score 26-40)

I samråd med Helsedirektoratet er gruppe 1 og 2 slått saman til kategorien "Noko skrøpelege" (prefragile), og gruppe 3 og 4 til kategorien "Skrøpelege" (fragile). Gruppa "Noko skrøpelege" er spesielt relevant for førebyggjande tiltak i både kommunar og spesialisthelseteneste.

Reinnlegging innan 30 dagar etter innlegging for skrøpelege eldre 

Ei reinnlegging er ei ny akuttinnlegging, uavhengig av årsak og sjukehus for reinnlegging, og som inntreff mellom åtte timar og 30 dagar etter utskriving frå eit frittståande sjukehusopphald (primærinnlegging). Indikatoren er oppgitt som rate pr. 1000 innbyggjarar og tal i den aktuelle aldersgruppa. 

Utskrivingsklare liggedøgn for skrøpelege eldre

Indikatoren viser talet på døgn der pasientar som blei meldt som utskrivingsklar frå døgnopphald, fortsette å opphalde seg på sjukehuset i påvente av eit kommunalt tilbod. Dette er ei teknisk teljing av utskrivingsklare liggedøgn og dei vil avvike noko frå dei fakturerbare liggedøgna som kommunen betaler for.

Metodiske avklaringar

Analysen inkluderer aktivitet i sektor 4 (somatiske sjukehusopphald). Dersom ein person er registrert i fleire kommunar i løpet av perioden, vert vedkommande lagt til den siste kommunen med registrert helsekontakt. Slik unngår ein dobbeltregistrering. Personar med ugyldig kommune nummer er ekskluderte og for grupper med færre enn fem personar vert det ikkje data på kommunenivå. Små avvik kan derfor forventast på grunn av anonymiseringsteknikk.

Datakjelder:
Norsk pasientregister (NPR)

Kommunalt pasientregister (KPR).

Referansar

[1] https://www.aldringoghelse.no/fysisk-helse/vanlige-sykdomsbilder-hos-eldre/skropelighet/

[2] https://www.fhi.no/he/iplos-registeret/